احبك ياوطن يااغله محبوب
ابد للموت عن حبك فلا اتوب
يل كلك محنه ياريحة الجنه
ياشمعة ورد للعاشك اتذوب
يــا اجمل حبيب ابروحي موجود
عيني وكلبي كلهن صارن اشهود
يــل حبك ابد ما حدته احدود
الك اهدي التحيه ياورد المسيه
لبست اثياب حبك يا اعز ثوب
يا دار الـــوادد يل تشع نور
ياريحــــة جبلنه وريحة الهور
يانســـمة شمالي التنفح ازهور
ياروح القوافي يل طبعك توافي
لولادك صرت ياموطني ادروب
حبك ياوطـــن بالنفس صاعد
كنائــس رددت بيك ومساجد
بسمـــك ترتجف كل القصائد
ماتكدر تجازيك يل طبع النخل بيك
تشيل الناس كلهه وانت متعوب
بجروحـك هوَّت كل السچاچين
لچن دمعك ابدما يعـــرف العين
يل نهجَك ابي من منهج حسـين
ما تقبل الذله رغم الجرح تعله
وتظل بكلوبنه ياوطن مهيوب
احبك ياوطن يا اغله محبوب
ابد للموت عن حبك فلا اتوب
الثلاثاء نوفمبر 27, 2007 12:11 pm